Ensul Engenharia investe dolár millaun 18 iha Sentru Negósiu no Finansa iha Dili

17 de Dezembro de 2013, 09:51

Ensul Engenharia horisehik lansa ona fatin dahuluk nian ba konstrusaun Sentru Negósiu no Finansa iha Díli, situa iha sentru kapitál timór nian, investimentu ida ne’ebé tau ho dolár millaun 18 (besik euro millaun 13).

“Investimentu ida ne’e hahú hala’o iha tinan sanulu liubá maibé kontratu loloos foin asina iha tinan 2012. Ami hakarak hahú obra ne’e no ami orgullu tebes, tanba hanesan konfiansa boot ida ne’ebé Governu Timór nian fó ami ninia empreza”, António Couto, fundadór empreza timoroan Ensul Engenharia nian, hatete.

Edifisiu ne’e sei harii ho besi no vidru, hakarakk kontribui hodi reabilita no moderniza kapitál timoroan nian, no sei iha andar sanulu, barak liu sei sai hanesan eskritóriu no estasionamentu ida.

“Obra ne’e sei kria postu serbisu barak no sei lori teknolojia foun sira ba Timór no ezijénsia maka’as tanba aposta ne’ebé ami halo maka edifísiu ne’e sei sai hanesan ho iha Lisboa, Paris no sei hanesan ho nesesidade Timor-Leste nian iha futuru”, António Couto hatutan.

Sentru Negósiu no Finansa sira iha Dili sei prontu iha tinan rua oinmai.

Serimónia lansamentu fatuk dahuluk nian partisipa hosi primeiru-ministru timoroan, Xanana Gusmão, membru oioin Governu nian, antigu xefe ezekutivu timoroan nian Mari Alkatiri, eis-prezidente timoroan no atuál reprezentante sekretáriu-jerál ONU nian iha Guiné-Bissau José Ramos-Horta.

Ensul Engenharia hala’o ninia atividade iha Timor-Leste iha tinan 13 liubá no fó serbisu ba timoroan na’in-200.

SAPO TL ho Lusa